Bakı metrosunun “Nizami” stansiyasında platformanın tavanının bərkidilməsi tədbirlərinə başlanılıb. Bu haqda bu gün, 11 avqust tarixində Bakuplus.az Report-a istinadən məlumat verir.
Gücləndirmə tədbirləri yalnız gecə saatlarında, sərnişinlərin metrodan istifadə etmədiyi vaxtlarda aparılacaq. Təmir müddətində stansiyada müvafiq nəzarət mexanizmləri fəaliyyət göstərəcək.
Görülən işlər çərçivəsində tavan örtüyü sökülərək, müvəqqəti işıqlanma sistemi qurulub. Tunel geyimi müvafiq qaydada korroziyadan təmizlənəcək, axıntılar ləğv olunacaq. Daha sonra korroziya əleyhinə boya maddəsi vurulacaq, suaxarlar quraşdırılacaq. Bütün texnoloji tədbirlər başa çatdıqdan sonra stansiyanın tavan örtüyü yenisi ilə əvəzlənməklə işıqlanma sistemi bərpa olunacaq.
