Ötən il Bakıda mahnı sifarişi və söyüş üstündə Dövlət Sərhəd Xidmətinin (DSX) baş giziri Cəsarət Vəliyevi qətlə yetiriməkdə, xidmətin digər əməkdaşı Camal Həsənova isə bıçaqla xəsarət yetirməkdə təqsirləndirilən Orxan Zeynalov və İlqar Abdurrahmanovun cinayət işi üzrə məhkəmə istintaqı tamamlanıb. Bu haqda bu gün, 31 iyul tarixində Bakuplus.az Report-a istinadən məlumat verir.
Bakı Ağır Cinayətlər Məhkəməsinin hakimi Eldar İsmayılovun sədrliyi ilə keçirilən prosesdə iş materialları öyrənildikdən sonra ibtidai istintaqın başa çatdırılması barədə qərar qəbul edilib.
Proses zamanı hadisə anına aid videomateriallar araşdırılarkən müəyyən edilib ki, Vəliyev uzun müddət xəsarətlə hadisə yerində qaldığından qan itirib. Məhkəmənin növbəti iclası avqustun 21-nə təyin olunub.
Hadisə metronun “20 Yanvar” stansiyası yaxınlığında yerləşən restoranda baş verib. 35 yaşlı Cəsarət Vəliyev restoranda musiqi sifariş vermək istəyən zaman digər masada oturan şəxslərlə mübahisəsi yaranıb. Nəticədə mübahisə kütləvi davaya çevrilib, Cəsarət Vəliyev bıçaqla öldürülüb, 29 yaşlı Camal Həsənov isə xəstəxanaya yerləşdirilib.
