Son günlər sosial şəbəkələrdə küçələrdə salfet satan uşaqların narkotik satması ilə bağlı xəbərlər yayılıb. Küçədə satılan salfetlərin içərisinə kiçik bükümlərdə narkotiklərin qoyulduğu iddia edilir. Bu haqda məlumatı bu gün, 9 fevral tarixində Bakuplus.az verir.
Paylaşım edən şəxsin sözlərinə görə, uşaqlara yazığı gələn sürücülər onlardan salfet aldıqları üçün narkotik maddə alıcısı (və ya istifadəçisi) kimi şübhəli şəxs qismində polis tərəfindən yolxanılırlar.
Bu mövzuda çoxsaylı yazıların birində qeyd olunub ki, salfeti aldıqdan sonra sürücüyə Çevik Polis Alayının əməkdaşları yaxınlaşdılar. Saxlanmaya səbəb narkotik maddənin alınması və ya istifadəsi olub. “Yanımda salfeti açdılar və içərisindən sintetik narkotik çıxdı. Yəni bir salfetə görə 1500 AZN cərimə yazdılar. Sadəcə təşəkkürlər", - paylaşımda deyilir.
Bu məsələ ilə bağlı DİN artıq araşdırmalara başlayıb. Məsələnin təfərrüatları araşdırmanın nəticəsindən sonra məlum olacaq.
