Nərimanov rayonunda MTK rəhbəri sakinlərə qarşı dələduzluq edərək pullarını mənimsəyib. Bu haqda 15 sentyabr tarixində Realtv məlumat verib.
İbrahimpaşa Dadaşov küçəsi, 57 ünvanında Təbriz MTK tərəfindən tikilən 13 mərtəbəli yaşayış binasının 84 mənzili 220 şəxsə satılıb. Zərərçəkənlər hələ binanın tikintisi zamanı ordan ev almaq üçün MTK-yə müraciət ediblər. Təbriz MTK-nın təsisçilərindən olan Nofəl Hacıyev dələduzluq məqsədilə evləri onlara ucuz qiymətə satıb. Ev aldıqlarına sevinən sakinlər binanın tikilib başa çatmasını gözləyirdilər, lakin aldıqları mənzillərin onlara təhvil veriləcəyi vaxt çatanda məlum olub ki, bina hələ tam tikilməyib. Təbriz MTK-dan isə əsər-əlamət yoxdur. Aldandıqlarını başa düşən sakinlər daha sonra hüquq-mühafizə orqanlarına müraciət ediblər. Məlum olub ki, sakinlərə ümumilikdə 15 milyon manatdan çox ziyan dəyib.
Zərərçəkən şəxslər, həmçinin bildirirlər ki, Nofel Hacıyev bu işdə tək deyil. O, MTK-nın digər rəhbər şəxsləri olan Tahir Qədəşov, Gülnarə Rəhmanova, Talış Məmmədov və qardaşı Rövşən Hacıyevlə əlbir olaraq onları aldadıb, pullarını oğurlayıb.
Faktla bağlı vəkil Qabil Məmmədov bildirib ki, Nofel Hacıyev artıq saxlanılıb və Baş prokurorun yanında Korrupsiyaya Qarşı Mübarizə Baş İdarəsində onun barəsidə cinayət işi açılıb.
