I və IV qrup imtahanlarının nəticələri açıqlanıb. Bu haqda bu gün, 27 iyul tarixində Bakuplus.az Dövlət İmtahan Mərkəzinə istinadən xəbər verir.
I və IV ixtisas qrupları, o cümlədən III qrup üzrə DT və TC altqruplarının hər ikisini seçənlər üçün coğrafiya fənni üzrə 14 iyul tarixində keçirilmiş qəbul imtahanının nəticələri elan edilib.
İmtahanda iştirak edən abituriyentlər nəticələri, cavab kartı və cavab vərəqinin qrafik təsvirləri, həmçinin hər bir açıq tipli tapşırıq üzrə qiymətləndirmə meyarları ilə buradan tanış ola bilərlər. Abituriyentlər imtahanın nəticəsi haqqında məlumatı, həmçinin mobil operatorlar vasitəsilə imtahana buraxılış vərəqəsində verilən kodu 7727 nömrəsinə göndərməklə də öyrənə bilərlər.
İmtahanda iştirak etmək üçün ərizə təsdiq etmiş 27929 abituriyentdən 767 nəfər imtahanda iştirak etməyib. 6 nəfər qaydaları pozduqlarına görə imtahandan xaric olunub və nəticələri ləğv edilib.
III qrup üzrə DT və TC altqruplarının hər ikisini seçən 5156 abituriyentdən 1576 nəfər coğrafiya fənni üzrə imtahana gəlməyib.
Bu imtahanda I ixtisas qrupu üzrə ən yüksək nəticəni (400 bal) 2 nəfər – Sumqayıt şəhər Təbiət elmləri təmayüllü gimnaziyanın məzunu Rüfət Əsədov və Bakı şəhər 283 saylı orta məktəbin məzunu Əli Məmmədli göstərib.
Hər iki mərhələnin cəminə görə I ixtisas qrupu üzrə ən yüksək nəticəni isə 697 bal toplayan Bakı şəhər 57 saylı orta məktəbin məzunu Rəbiyyə Əlizadə göstərib.
Bu imtahanda IV ixtisas qrupu üzrə ən yüksək nəticəni (397 bal) 2 nəfər – Füzuli rayon Böyük Bəhmənli kənd 1 saylı orta məktəbin məzunu Orxan Abbasov və Gəncə şəhər 39 saylı orta məktəbin məzunu Nuray Hüseynova göstərib.
Hər iki mərhələnin cəminə görə IV ixtisas qrupu üzrə ən yüksək nəticəni də 697 bal toplayan Nuray Emin qızı Hüseynova göstərib.
Ali təhsil müəssisələrinə qəbul olmaq üçün müsabiqə şərtlərini ödəyən abituriyentlərin ixtisas seçimi 9 – 19 avqust tarixlərində aparılacaq.
