Rəqəmsal İnkişaf və Nəqliyyat Nazirliyinə yeni təyinat olub. Bu haqda bu gün, 29 aprel tarixində Bakuplus.az Report-a istinadən xəbər verir.
37 yaşlı Elmin Məmmədov və 36 yaşlı Şahin Babayev rəqəmsal inkişaf və nəqliyyat nazirinin müavinləri təyin olunublar. Bununla bağlı Prezident İlham Əliyev Sərəncam imzalayıb.
E.Məmmədov Bakı Dövlət Universitetində Hüquqşünaslıq ixtisası üzrə bakalavr, Almaniyanın Saarland Universitetində Avropa hüququ üzrə magistr təhsili alıb. O, Ədliyyə Nazirliyinin Qanunvericilik Baş İdarəsində, Nazirlər Kabineti Aparatının Beynəlxalq əməkdaşlıq şöbəsində, eləcə də Prezident Administrasiyasının Qanunvericilik və hüquq ekspertizası məsələləri şöbəsində müxtəlif vəzifələrdə çalışıb. 2021-ci ildən Rəqəmsal İnkişaf və Nəqliyyat Nazirliyinin Hüquq şöbəsinin müdiri vəzifəsində işləyib.
Ş.Babayev Azərbaycan Dövlət İqtisad Universitetində İqtisadiyyatın hüquqi tənzimlənməsi ixtisası üzrə təhsil alıb, Beynəlxalq İmtiyazlı Sertifikatlaşdırılmış Mühasiblər Assosiasiyasının (Association of Chartered Certified Accountants, ACCA) üzvüdür. O, "Sumqayıt Texnologiyalar Parkı" MMC, “Azərkosmos” və sonuncunun Maliyyə departamentinin rəhbəri vəzifəsində işləyib. Bu təyinata qədər rəqəmsal inkişaf və nəqliyyat nazirinin müşaviri olub.
