Səhiyyə Nazirliyinin “Məhkəmə-Tibbi Ekspertiza və Patoloji Anatomiya Birliyi”nin Xəzər Rayon Şöbəsinin əməkdaşı Rövşən Eynullayev həbs edilib. Bu haqda bu gün, 19 avqust tarixində Bakuplus.az Bizim.media-ya istinadən xəbər verir.
Kiçik tibb işçisi olan 30 yaşlı Rövşən Eynullayev Cinayət Məcəlləsinin 178.3.2-ci (Külli miqdarda dələduzluq) maddəsi ilə ittiham olunub.
O, həbsdə olan şəxsin nənəsindən onu azad edəcəyi vədi ilə 55 min manat alıb. Eynullayev özünü nüfuzlu şəxslərlə yaxın münasibətdə olan biri kimi təqdim edərək, pulu həmin şəxslərə çatdıracağını iddia edib. Lakin, sonradan onun yalanı ifşa olunub.
Eynullayevin iş yoldaşı olan həkimdən MİDA-nın inşa etdiyi binadan güzəştli şərtlərlə mənzil almağa kömək edəcəyi vədi ilə 3700 manat alması da üzə çıxıb.
Bakı Ağır Cinayətlər Məhkəməsi 14 avqust tarixində Rövşən Eynullayevə 6 il 6 ay həbs cəzası verib və mülki iddia təmin edilib. Zərərçəkmiş şəxsə 55 min manat məbləğində pul ödəniləcək.
