Ötən gün Səməd Vurğun küçəsində baş vermiş silahlı hücuma görə saxlanılan şəxslərin kimliyi məlum olub. Bu haqda bu gün, 11 mart tarixində Qafqazinfo məlumat verib.
Şübhəli şəxs qismində tutulan şəxslər Şahmar İsmayılov, Elvin Qasımov və Vüqar Quliyevdir. Küçədə piyadaları yaralayan şəxs Şahmar İsmayılovdur. Saxlanılanların hər üçü əslən naxçıvalıdır.
İlkin məlumata görə, həmin şəxslər kriminal münaqişə çərçivəsində Nicat Lənkəranski (Nicat Əkbərov) və Seymur Həsənovu vurmaq istəyiblər. Lakin o, atəş açanda hədəfə çata bilməyib. Nəticədə daha iki vətəndaş kriminal klanlar arasında sövdələşmənin qurbanı olub. Güllələnən iki nəfər xəstəxanaya yerləşdirilib.
Nicat Lənkəranski və Seymur Həsənov əslən lənkəranlıdırlar. Nicat bir neçə il əvvəl öldürülmüş Rövşən Lənkəranskinin yaxın adamı olub.
Ötən ilin payızında İstanbulda Nicat Lənkəranskinin adamları Emin Naxçıvanskinin qardaşı Elnur Qasımovu (“Qardaşoğlu”) qətlə yetiriblər. Bu səbədən Naxçıvan klanı qan qisası almaq məqsədilə Nicat və Seymuru öldürtdürmək qərarına gəlib və Şahmar İsmayılovu killer tutub.
Tutulan Elvin Qasımov isə digər kriminal avtoritet Emin Naxçıvanskinin qardaşıdır.
