Bakının Nizami rayonu, Ordubadi küçəsi 7 ünvanında yaşayan sakinlər “Orbita” MTK-dan şikayətçidirlər.
9-cu mənzilin sahibi Vaqif Musazadə Bakuplus.az-ın redaksiyasına ünvanladığı şikayətdə özünün və digər iki qonşusunun (Vəkil İbrahimov və Mübariz Şəmiyev) evlərinin plana düşdüyünü iddia edir.
“Orbita” MTK-a bizimlə razılığa gəlmir, əlavə vəsait ödəmir. Yalnız həmin ərazidən sahəsi mənzilimizdən daha az olan ev ilə təmin edəcəklər. Məhkəmədə MTK-nın saxta iddiasına görə uduzmuşuq. Onlar məhkəməyə bizim yaşadığımız mənzillərin vaxtı ilə yataqxana olduğunu deyiblər. Bizim isə bütün sənədlərimiz qaydasındadır. Sənəddə belə bir şey qeyd olunmayıb. Bu qədər saxtakarlıq olmaz. 1991-ci ildən mən burada yaşayıram. Mənim 5 otaqlı mənzilim var. Bununla yanaşı əlavə həyətyanı sahəm var. Lakin onlar mənə 98 kvadrat metr ev verirlər. Bura sovetlərin dövründə Lampa zavodunun nəzdində uşaq bağçası olub. Qanuni şəkildə ev növbəsində olan insanlara veriblər”.
V.Musazadə sonda Rayon İcra Hakimiyyəti tərəfindən mənzillərin MTK-ya icarəyə verildiyini bildirib:
“Sonradan bilmişik ki, İcra Hakimiyyəti evimizi bizimlə razılaşma olmadan MTK-ya 49 illiyinə icarəyə verib”.
Bakuplus.az qarşı tərəfin mövqeyini öyrənməyə çalışıb.
Məsələ ilə bağlı şirkətin köçürmə məsələləri üzrə baş məsləhətçisi Söhrab Əhmədov bildirib ki, sözügedən mənzillər yataqxana balansında olan bağçanın yerində tikib:
“Tək elə Ordubadi küçəsi 7-nin özündə 33 sakin olub. 30-u köçüb. Üç sakin qalıb. İki ildir ki, tikinti şirkəti ilə sakinlər arasında məhkəmə gedir. Məhkəmə də qanunauyğun qətnamə çıxarır. Köçürmələri ilə bağlı məhkəmə qərarı icraata verilib. Binanı üç nəfərə görə tikə bilmirik. Tikinti gecikir. Ali məhkəmənin isə qərarı var. Torpaq dövlətindir, onların deyil. Bakı Şəhər İcra Hakimiyyətinin sərəncamı mövcuddur. Bunlar müasir tələbələrə cavab verməyən binalardır”.
Nəzrin Vahid
