Son zamanlar ölkəmizdə getdikcə daha çox insan göz rəngini dəyişdirmək üçün əməliyyat keçirməyə qərar verir. Bu əməliyyatı sırf gözəllik üçün edirlər. Göz rəngini dəyişmək əməliyyatı adətən iridolojiya adlanan bir prosedurla həyata keçirilir. Həmin əməliyyat gözün irisinin rəngini dəyişmək məqsədilə edilir və gözün irisinin üst qatına xüsusi bir implant yerləşdirilir.
Bir çox tanınmış şəxslər də göz rəngi əməliyyatı etdirirlər. Və sosial şəbəkələrdə göz rəngini həmişəlik necə dəyişdiklərini nümayiş etdirərək öz təcrübələrini bölüşürlər, bir növ çağırış edirlər. Aparıcılar Nanə Ağamalıyeva və Mətanət Əliverdiyeva da bu əməliyyatı etdirib, göz rəngini dəyişiblər. Göz rəngi dəyişmə əməliyyatı bir çox ölkələrdə mübahisəlidir və qanunla tənzimlənir.
Qeyd edək ki, 2024-cü ilin əvvəlində Amerika Oftalmologiya Akademiyası keratopiqmentasiyanın təhlükələri və göz rənginin dəyişdirilməsinin digər üsulları haqqında xəbərdarlıq edib. Böyük Britaniyada bu prosedur kosmetik məqsədlər üçün tamamilə qadağandır. Bunu etmək istəyənlər xüsusi olaraq xaricə getməyə məcbur olurlar.
Bəs görəsən, göz rəngini dəyişmə əməliyyatın hansı riskləri var?
Mövzu ilə bağlı Bakuplus.az-a açıqlama verən oftalmoloq Elmira Yusubovanın sözlərinə görə, göz rəngi dəyişmə əməliyyatı çox fəsadlı bir prosedurdur:
“Bu prosedur pasiyentin gözündə adətən hər hansı bir problem, ləkə və çapıq olan zaman edilir. Sağlam gözdə bu proseduru etmək qətiyyən olmaz. Çünki gələcəkdə ciddi fəsadlar meydana gələ bilər. Bir həkim kimi heç kimə göz rəngini dəyişmə əməliyyatını məsləhət bilmirəm”.
E.Yusubova qeyd edib ki, göz rəngi dəyişmə əməliyyatından sonra pasiyent hər şeyi həmin rəngdə görür:
“Əməliyyatdan sonra görmə prosesində ciddi problemlər üzə çıxa bilər. Gözün sağlam qişasını rəngləyirlər. Əlbəttə ki, ciddi problemlər yaranacaq. Buynuz qişa şəffaf olmalıdır. Bu yaradılışdan belədir. Buynuz qişanı rəngləndiyi üçün hər şeyi həmin rəngdə görürlər. Çünki buynuz qişanın kölgələri məhv olur. 5-10 il sonra ciddi fəsadları ilə də üzləşəcəklər. Əməliyyat olunanların başlarına gələcəklərdən xəbərləri yoxdur. Gec-tez fəsadları olacaq. Əməliyyat etdirib, narazı qalanlar da az deyil”.
