Yeni dövlət qeydiyyatına alınan 187 dərman vasitəsinin qiymətinin yuxarı həddi təsdiqlənib.
Bu barədə Tarif Şurasının ötən gün keçirilən iclasında qərara baxılıb.
Həmçinin 8 dərman vasitəsinin qiymətinin yuxarı həddi aşağı salınıb və etibarlı təchizatın təmin olunması məqsədilə 46 dərman vasitəsinin qiymətinin yuxarı həddində Nazirlər Kabinetinin 2015-ci il 3 iyun tarixli 209 nömrəli Qərarı ilə təsdiq olunmuş Qaydalara və Tarif (qiymət) Şurasının 2015-ci il 21 iyul tarixli Qərarı ilə təsdiq edilmiş Təlimata uyğun olaraq dəyişikliklər aparılıb. Qərar aprelin 5-dən qüvvəyə minir.
Bunu ölkəmizdə dərmana olan tələbat ilə əlaqələndirirlər.
Bəs, görəsən, ölkədə dərmanlara tələbat həqiqətənmi artıb?
Mövzu ilə bağlı Bakuplus.az-a açıqlama verən Azərbaycan Tibb Universitetinin Farmakologiya kafedrasının dosenti, farmakoloq Aydın Əliyevin sözlərinə görə, qiymət dəyişkənliyin bir səbəbi ölkəmizdə dərmana olan tələbat ilə bağlıdır:
“Dərmanlara olan ehtiyac çoxalıb. Bu, yaşadığımız mühit, ekoloji narazılıqlar, keyfiyyətsiz su, qida, müəyyən gərginliklər ilə bağlıdır. Bununla yanaşı həkimsiz dərman alanlar da var. Bunlar hamısı dərmana olan tələbatı artırır.
Tarif Şurasının qiymətlərə müdaxilə etməsi çox normaldır. Çünki dərmanların əksəriyyəti xaricdən gətirilir. Onların da bəzən keyfiyyətsiz olduğu ortaya çıxır. Xaricdən gətirilən dərmanlar bizim Tibbi Ekspertiza Şurasından keçməlidir”.
A.Əliyev qeyd edib ki, Azərbaycanda yerli dərmanların istehsalına başlanmalıdır:
“Bizim öz zavodlarımız açılmalı, yerli dərmanların istehsalına başlanmalıdır. Lakin hələlik biz xaricdən asılıyıq. Tarif Şurası müdaxilə etməsə, özbaşınalıq olar”.
“Hətta deyərdim ki, Azərbaycanda Farmakologiya Elmi Tədqiqat İnstitutu açılsın. Burada yeni dərmanlar hazırlanmalıdır. Olsa, biz özümüz dərmanları öyrənməyə başlayarıq. Alimlərimiz də var.
Artıq elektron reseptlər mövcuddur. Onlara kodla daxil olmaq, dərmanlar haqqında daha geniş məlumat almaq mümkündür”, - deyə A.Əliyev əlavə edib.
Nəzrin Vahid
