Son dövrlərdə onlayn ticarət populyarlığı artıb. İnsanlar dünyanın müxtəlif ölkələrindən istədikləri məhsulları onlayn sifariş verib əldə edə bilirlər. Bu yalnız geyim deyil, həm də mebel, tekstil malları, qab-qaşıq, avtomobil kimi məhsulları da əhatə edir.
Bizim.Media xəbər verir ki, lakin insanların ölkəyə idxalı mümkün olmayan mallarla bağlı problemlər yaranır. Məsələn, bəzi məhsullar, xüsusən səyahət və velosiped sürmək üçün nəzərdə tutulmuş kameralı eynəklər, sərhəd keçidində qanunla qadağan edildiyi üçün ölkəyə gətirilə bilmir.
Azərbaycana gətirilməsi qadağan olan mallar hansılardır? Kameralı və fanarlı eynəklərin gətirilməsi də qadağandır?
Dövlət Gömrük Komitəsindən verilən məlumata görə, belə əşyalar yalnız xüsusi icazə ilə gətirilə bilər. Qadağa və məhdudiyyətlər “Mülki dövriyyədə olmasına yol verilməyən əşyaların siyahısı” və “Mülki dövriyyənin müəyyən iştirakçılarına mənsub ola bilən əşyaların siyahısı” qanunları ilə müəyyən edilir. Gizli informasiya əldə etmək üçün nəzərdə tutulmuş texniki vasitələrin dövriyyəsi isə Azərbaycan Dövlət Təhlükəsizliyi Xidməti tərəfindən verilən xüsusi icazə ilə mümkündür.
