"Övladlarımız peşələrini özləri seçiblər. Biz həyat yoldaşımla bunu yaşadıq. Mən çox istədim ki, böyük oğlumuz mühəndis olsun. Getdi oxumağa, 3–4 il təhsil də aldı, amma sonradan dəyişdi. Dedi ki, "ata, mən bunu istəmirəm, bu sizin seçiminiz idi".
Bu sözləri Bakı Musiqi Akademiyasının dirijorluq kafedrasının professoru, Xalq artisti, "Şöhrət" ordenli dirijor Yalçın Adıgözəlov qafqazinfo.az-a müsahibəsi zamanı deyib.
Xalq artisti bildirib ki, üç övladından yalnız ən kiçiyi musiqi sənətinə maraq göstərir, digərləri isə fərqli sahələri seçib:
"Böyük oğlum sonradan başqa universitetə qəbul oldu, bitirdi və çalışır. Qızım istəyirdi ki, həkim olsun. Çünki hər ailəyə bir həkim lazımdır. Bilirsiniz ki, mənim qardaşım da həkimdir. Anam tərəfdən qohumlarımızın yarısı dilçi, yarısı isə həkimdir. Qızımız düz 5 il həkimlik oxudu. Amma 5 ildən sonra dedi ki, "mən istəmirəm". O da başqa universitetə getdi, oxudu və hazırda öz seçdiyi peşədə çalışır.
Demək istəyirəm ki, övladlarımız bizim malımız deyil. Bu, bəlkə, bir az kobud səslənir, amma biz onlara sahib deyilik. Peşə seçiminə də sahib deyilik. Mən heç kiçik oğlum Tamerlana da basqı yaratmadım. Özü istədi və dedi ki, "ata, mənə imkan ver, xoşum gəlir, məşğul olmaq istəyirəm". Mən də bir tərəfdən istəyirəm. Çünki davam etsə, dördüncü nəsil olacaq. Sözün düzü, başqa tərəfdən də könlüm ağrıyır. Çünki bilirəm ki, nələrdən keçməlidir. 66 yaşım var, mən hələ də o əzablı yolları davam edirəm".
Y. Adıgözəlov musiqi sahəsindəki haqsızlıqlardan da danışıb. Onun sözlərinə görə, hər yerdə olduğu kimi sənət aləmində də haqsızlıqlar var:
"Dəyərli insanları qoruyub saxlaya bilmirik, onlara lazımi qiyməti verə bilmirik. Bəzən isə bu sahəyə təsadüfi insanlar rəhbərlik etməyə çalışırlar. Azərbaycanda belə şeylər olmamalıdır. Burada yaşamayan, xalqını, millətini, musiqisinin incəliklərini bilməyən insanlar bu sahəyə rəhbərlik edə bilməz, bu mənim fikrimdir".
