Palçıq Vulkanları Turizm Kompleksinin açılışı olub. Bu haqda bu gün, 13 iyun tarixində Bakuplus.az Prezidentin rəsmi saytına istinadən xəbər verir.
Azərbaycan Respublikasının Prezidenti İlham Əliyev Abşeron rayonunun Qobustan qəsəbəsi ərazisində Palçıq Vulkanları Turizm Kompleksinin açılışında iştirak edib.
Palçıq Vulkanları Turizm Kompleksi 12 hektar ərazidə tikilib. Burada inzibati bina inşa olunub. Yaradılan yeni turizm infrastrukturu yerli əhali, xüsusilə ətraf ərazilərdə məskunlaşmış insanlar üçün 60-dan çox yeni iş yerinin açılmasına imkan verib. Kompleksin Turizm İnformasiya Mərkəzi sərgi zalından və emalatxanadan ibarətdir.
Mərkəzdə palçıq vulkanlarının xüsusiyyətləri, təbii və müalicəvi özəllikləri haqqında məlumat əldə etmək, palçıq vulkanının maketi ilə tanış olmaq mümkündür. Burada, həmçinin Azərbaycanın hər yerindən toplanmış 80-ə yaxın nadir mineral nümayiş etdirilir. Sərgidə mineral nümunələrinin adı, kimyəvi tərkibi və götürüldüyü yatağa dair məlumatlar da yer alır. Emalatxanada isə dulusçuluq və neftlə rəsmlərin çəkilməsi üzrə master-klaslar təşkil ediləcək.
Sərgidə Azərbaycan və dünya faunasına aid 98 heyvan skeleti, 870 müxtəlif növ qurudulmuş həşərat, xüsusi məhlulda nümayiş etdirilən 57 canlı, bir sıra sürünən və suda-quruda yaşayan heyvanlar, həmçinin paleontoloji eksponatlar nümayiş etdirilir.
Ərazidə 110 nəfərlik restoran da tikilib, turistlərin vulkanları izləmələri üçün piyada yolu çəkilib. Burada panoramlı müşahidə nöqtəsi və meydança da salınıb.
