Bakı Şəhər Dövlət Yol Polisi İdarəsindən (BŞDYPİ) sürücülərə Cavanşir körpüsü ilə əlaqədar müraciət edilib. Bu haqda bu gün, 18 may tarixində Bakuplus.az Daxili İşlər Nazirliyinə (DİN) istinadən xəbər verir.
Mayın 20-də saat 17:00-dan etibarən Cavanşir körpüsü üzərində nəqliyyatın hərəkəti məhdudlaşdırılacaq. Bununla bağlı bir sıra küçələrdə hərəkətdə dəyişikliklər edilib.
Afiyəddin Cəlilov küçəsindən mərkəzə gedən sürücülər Fəzail Bayramov küçəsinə yönləndirilməklə, hərəkətlərini Sabit Orucov və Nizami küçələri istiqamətində davam etdirəcəklər. Bu məqsədlə F.Bayramov küçəsində yol S.Orucov küçəsi istiqamətində birtərəfli olacaq.
S.Orucov və Nizami küçələrində isə əks-istiqamətdə birtərəfli hərəkət təşkil olunacaq. Nizami küçəsi ilə mərkəzə doğru hərəkət edən avtomobillər Kövkəb Səfərəliyeva və Puşkin küçələri vasitəsilə Üzeyir Hacıbəyli küçəsinə çıxa biləcəklər.
K.Səfərəliyeva küçəsinin Ələddin Quliyev küçəsindən Ü.Hacıbəyli küçəsinədək olan hissəsində, eləcə də Puşkin küçəsinin 28 May küçəsi ilə Ü.Hacıbəyli küçəsi arasındakı hissəsində hərəkət Neftçilər prospekti istiqamətində birtərəfli olacaq.
Bununla yanaşı, K.Səfərəliyeva küçəsindən Cavanşir körpüsü tərəfə avtomobillərin hərəkətinə icazə veriləcək.
Mehdi Mehdizadə küçəsindən 28 May küçəsinə birbaşa çıxış məhdudlaşdırılacaq. Sürücülərə Y.Səfərov küçəsində yerləşən geriyə dönmə yerindən istifadə etmək lazım olacaq.
