Bakıda elektrobuslar üçün xüsusi şarj xətləri ayrılır. Bu haqda bu gün, 20 iyun tarixində Bakuplus.az Azərbaycan Avtomobil Yolları Dövlət Agentliyinə (AAYDA) istinadən məlumat verir.
Hazırda müvafiq işlər "28 May" stansiyası ətrafındakı ərazidə yaradılacaq nəqliyyat mübadilə mərkəzinin ərazisində aparılır. İş prosesində nəqliyyatın hərəkətinin dayandırılması nəzərdə tutulmur. Qazıntı işləri 45 gün müddətinə - 2024-cü il iyunun 14-dən iyulun 29-dək Bakı Şəhər Dövlət Yol Polisi İdarəsinin tələblərinə uyğun olaraq aparılır.
Bununla yanaşı, metronun "Dərnəgül" və "28 May" stansiyaları ətrafındakı ərazilər də yaradılacaq nəqliyyat mübadilə mərkəzlərinin etibarlı elektrik enerjisi ilə təmin olunacaq. Bu səbədən qazıntı işləri bir sıra küçələrdə aparılacaq:
- Binəqədi rayonu Ə.Rəcəbli küçəsi, S.S.Axundov küçəsi ("Dərnəgül" metrosunun qarşısı),
- Nərimanov rayonu Nemət Quliyev küçəsi boyu,
- Xətai prospektini kəsməklə Nəsimi rayonu,
- Süleyman Rəhimov küçəsi boyu (M.Qaşqay küçəsini kəsməklə),
- Azadlıq prospekti boyu, metronun "28 May" stansiyasının qarşı ilə (C.Cabbarlı heykəlinin yanından Pușkin küçəsi istiqamətində) Azadlıq prospektini kəsərək,
- Süleyman Rəhimov küçəsi boyu (S.Rüstəm küçəsini, R.Behbudov küçəsini və Bülbül prospektini kəsməklə),
- Səməd Vurğun küçəsi boyu (Füzuli küçəsini, Ş.Bədəlbəyli küçəsini kəsərək),
- Mirzağa Əliyev küçəsi boyu (Azərbaycan prospektini kəsməklə).
Qazıntı işləri "Bakı Telefon Rabitəsi" MMC, "Azərişıq" ASC, "Azəristiliktəchizat" ASC, "Azəriqaz" İB, Kabel Magistralları Texniki Qovșağı, Bakı Sukanal İdarəsi və başqa əlaqədar təşkilatların ("Azneft" İB, "Azərenerji" ASC-nin Rabitə İdarələri və s.) nümayəndələrinin nəzarəti altında həyata keçirilir.
