Pirallahı Sənaye Parkında şəkəri təyin edən cihazlar, birdəfəlik üçkomponentli şprislər və 7 növdə (tablet, kapsul, jelatin kapsul, toz, suspenziya, sirop və s.) dərman məhsulları istehsal ediləcək. Buraya bioloji aktiv qida əlavələri və dərman vasitələri də daxildir.
Bakuplus.az İqtisadiyyat Nazirliyi yanında İqtisadi Zonaların İnkişafı Agentliyinə istinadən xəbər verir ki, hazırda Parkda şpris, sterilləşmiş damardaxili kateter, sterilləşmiş infuziya dəsti, lateks steril cərrahi əlcək, Diabeton MR və digər məhsullar istehsal olunur. Məhsullar əsasən daxili bazar üçün nəzərdə tutulub, gələcəkdə isə ixrac olunacaq.
Pirallahı Sənaye Parkında 121 milyon manatdan çox investisiya yatırmış 7 sahibkarlıq subyektinə rezidentlik verilib, bunlardan 2-si artıq fəaliyyətə başlayıb. Rezidentlər Parka 40 milyon manatdan artıq sərmayə qoyub, 140-dan çox daimi iş yeri açıb. Növbəti mərhələdə əlavə 80 milyon manatdan çox investisiya qoyulması və 400-dən çox iş yeri yaradılması planlaşdırılır. İndiyə qədər 53 milyon manatlıq satış həyata keçirilib, bunun 7,5 milyon manatı bu ilin ilk yarısındadır.
Parkda rezident olmaq istəyənlər əsasən dərman istehsalı sahəsində müraciət edir. Onlar müasir texnologiyalarla beynəlxalq standartlara uyğun yüksək keyfiyyətli dərmanlar istehsal edir, texnologiyalar Almaniya, İtaliya, Türkiyə və İsveçrəyə məxsusdur.
