Bakıda yol hərəkəti qaydalarını pozan piyadalar cərimələri ödəməkdən yayınırlar. Bu səbəbdən onların barəsində bir sıra məhdudiyyətlər tərtib olunacaq. Bu haqda bu gün, 20 oktyabr tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
DİN-dən bildirilir ki, paytaxtda 10 ilin statistikası göstərir ki, yol-nəqliyyat hadisələrinin daha çoxu piyadavurma hallarıdır. Bu səbəbdən də piyadalara nəzarət mexanizmlərinin də sərtləşdirilməsi qaçılmazdır.
Hazırda Bakı şəhərində piyadalar tərəfindən edilən 17.000-dən artıq qayda pozuntusu üzrə cərimələr vətəndaşlar tərəfindən ödənilməyib. Nazirlikdən cərimələrini ödəməyən piyadaların gələcəkdə problemlərlə üzləşəcəyi də vurğulanıb. Həmin şəxslərlə bağlı artıq müvafiq orqanlara müraciət göndərilib. Bildirilir ki, həmin şəxslər ölkədən çıxmaq istəyəndə, yaxud hansısa proses keçirərkən yaranmış öhdəliklərinə əsasən, müəyyən məhdudiyyətlərlə qarşılaşacaqlar.
Cərimələri my.gov.az saytına daxil olaraq öyrənmək mümkündür. Cərimələrin ödənilməsi vətəndaşın pensiya, əməkhaqqı və digər formada bank kartına yönləndirilir.
