Əməkdar artist Faiq Sadıqov reanimasiyaya yerləşdirilib. Bu haqda bu gün, 22 aprel tarixində Bakuplus.az Manşet.az-a istinadən xəbər verir.
Onun qızı Əminə Sadıqovanın verdiyi məlumata görə, Prezident təqaüdçüsü, Səid Rüstəmov adına Xalq Çalğı Alətləri Orkestrinin bədii rəhbəri və baş dirijoru Faiq Sadıqovun vəziyyəti pisləşib və o, özəl xəstəxanalardan birinə yerləşdirilib.
Artistin ağciyərində problemi olduğu və son zamanlar nəfəs almaqda çətinlik çəkdiyi üçün həkimin məsləhəti ilə evdə süni oksigen aparatına qoşulurdu. Axır vaxtlar həmin aparatdan çox istifadə etdiyi üçün ürəyində kəskin problem yaranmışdı.
“Atamın qəfil vəziyyəti pisləşdi, təcili yardımla Bakıdakı özəl klinikalardan birinə yerləşdirdik. Hazırda reanimasiyadadır, oksigen aparatına qoşulub. Həmin klinika çox bahalıdır, biz onun müalicə xərclərini ödəyə bilmirik. Son bir həftə ərzində onun müalicəsinə 10 min manatdan çox pul xərcləmişik. Aidiyyəti dövlət qurumlarından xahiş edirəm ki, atamın müalicəsinə köməklik göstərsinlər”, – deyə mədəniyyət xadiminin qızı bildirib.
