Botanika İnstitutunun yeni inşa olunmuş binasının açılışı baş tutub. Bu haqda bu gün, 21 iyun tarixində Bakuplus.az Report-a istinadən xəbər verir.
Mərasimdə Prezident İlham Əliyev və birinci xanım Mehriban Əliyeva iştirak ediblər. Həmçinin onlar Nəbatat Bağında həyata keçirilən yenidənqurma və tikinti işləri ilə tanış olublar.
Beş mərtəbədən ibarət yeni binanın ümumi sahəsi 3700 kvadratmetrdir. Binanın birinci mərtəbəsi laboratoriya sektorlarından ibarətdir. Burada bitki ehtiyatları və etnobotanika, həmçinin toxum bankı, bitki introduksiyası şöbələri yerləşir.
Binanın ikinci mərtəbəsində 80 nəfərlik akt zalı, üç laboratoriya, müdafiə şurası, Botanika İnstitutunun elmi şurasının katibliyi, mühasibatlıq yerləşir.
Üçüncü mərtəbədə isə geobotanika, ictimaiyyətlə əlaqələr, eksperimental botanika və beynəlxalq əlaqələr şöbələri fəaliyyət göstərəcək.
Yaxınlıqda yerləşən 45 hektardan artıq ərazini əhatə edən bağda 247 növ ağac və 162 növ kol bitkisi qorunur.
Mərkəzi Nəbatat Bağı ərazisində oranjereyanın eni 19, uzunluğu 47, hündürlüyü isə 15 metrdir. Daxilində yerdən 3 metr hündür körpü və hər iki qapını birləşdirən piyada yolu var. Oranjereya müasir tipli isitmə, soyutma və nǝmləndirmə avadanlıqları ilə təchiz olunacaq. Üzərindəki şüşə sisteminin 40 ədədi avtomatik açılaraq mövsümə uyğun havalandırmanı təmin edəcək.
