Azərbaycan Respublikasının Prezidenti İlham Əliyev sentyabrın 14-də Bakının Səbail rayonunda yerləşən “Xəqani” bağında və ətraf ərazilərdə aparılmış abadlıq və yenidənqurma işlərindən sonra yaradılan şəraitlə tanış olub.
Bakuplus.az Azərbaycan Prezidentinin Mətbuat xidmətinə istinadən xəbər verir ki, Bakı Şəhər İcra Hakimiyyətinin başçısı Eldar Əzizov Prezidentə bağdakı abadlıq və yenidənqurma işləri barədə məlumat verib.
“Xəqani” bağının ərazisi genişləndirilib, istirahət guşəsinin ətrafındakı Rəsul Rza, Qoqol və Xəqani küçələrində avtomobil yolları ləğv edilərək piyadaların istifadəsinə verilib. Bağın 1,4 hektar ərazisində yaşıllaşdırma, işıqlandırma işləri görülüb, müasir oturacaqlar quraşdırılıb, uşaq əyləncə zonası yaradılıb və ətrafdakı binalarda təmir-bərpa işləri aparılıb.
Bu, Prezidentin Bakı şəhərində parkların və xiyabanların təmiri və yenidən qurulması ilə bağlı tapşırıqlarına əsasən abadlaşdırılmış növbəti istirahət guşəsidir. Şəhərin mərkəzində sakinlərin istirahəti üçün qısa müddətdə gözəl şərait yaradılıb.
