Bu gün, dekabrın 25-də Azərbaycan Prezidenti İlham Əliyev Hövsan aerasiya qurğusundan Xəzər dənizinə axıdılan tullantı sularının təmizlənməsi və təkrar istifadəsi üzrə pilot layihənin həyata keçirilməsi ilə bağlı tədbirlər haqqında Sərəncam imzalayıb.
Sərəncama əsasən, alternativ su mənbələrindən istifadənin genişləndirilməsi, su itkilərinin azaldılması, tullantı sularının təmizlənməsi və təkrar istifadəsi, habelə bu sahəyə yeni texnologiyaların cəlb edilməsi nəzərdə tutulur.
Azərbaycan Respublikasının Nazirlər Kabinetinə qabaqcıl beynəlxalq təcrübə nəzərə alınmaqla pilot layihənin həyata keçirilməsi üçün zəruri tədbirlərin görülməsini təmin etmək, habelə bu Sərəncamdan irəli gələn digər məsələləri həll etmək tapşırılıb.
