Paytaxt ərazisində qadının intim görüntülərini sosial şəbəkədə yayan şəxsə hökm oxunub. Bu haqda bu gün, 17 iyul tarixində Bakuplus.az Qafqazinfo-ya istinadən xəbər verir.
Xəzər Rayon Məhkəməsinin hökmü ilə E.Vahabov 3 il müddətinə azadlıqdan məhrum edilib.
Şəki rayonunun kəndlərindən birinin sakini, 30 yaşlı E.Vahabov əvvəllər də oxşar cinayətə görə axtarışda olub. Axtarışda olduğu zaman o, restoranda qadınla tanış olub və aralarında sevgi münasibəti yaranıb.
Vahabov həmin qadınla paytaxtdakı hotellərin birində bir neçə dəfə görüşüb və videoya çəkib. Daha sonra isə intim görüntüləri yayıb.
Qadının tanışları həmin görüntüləri ona göndərərək yayılmış videolar barədə xəbər veriblər. Bundan sonra qadın E.Vahabova yazaraq bu əməllərinə son qoymasını tələb edib. O isə münasibətdə olduğu qadından 50 manat tələb edərək alıb. Kişi yenidən pul tələb etdikdə qadın polisə müraciət edib və faktla bağlı Cinayət Məcəlləsinin “Hədə-qorxu ilə tələb etmə” maddəsi ilə cinayət işi açılıb.
