Bakıda ötən ilin iyul ayında sərnişinə qarşı seksual xarakterli hərəkətlər edən taksi sürücüsü Yusif Quliyevin (ad və soyad şərtidir) cinayət işi üzrə məhkəmə prosesi başa çatıb. Bu haqda bu gün, 26 iyul tarixində Bakuplus.az Oxu.az-a istinadən məlumat verir.
Cinayət işinə Bakı Ağır Cinayətlər Məhkəməsində baxılıb. Taksi sürücüsü Cinayət Məcəlləsinin “Seksual xarakterli zorakılıq hərəkətləri” maddəsi ilə təqsirli bilinib. Hakimin qərarı ilə təqsirləndirilən şəxs 5 il müddətinə azadlıqdan məhrum edilib.
Cinayət işinin materiallarına əsasən, hadisə gecə saat 03:00 radələrində Mərdəkan şosesində baş verib. Qadın Heydər Əliyev Beynəlxalq Hava Limanına getmək məqsədilə komfort taksi sifariş edib. Aeroporta tərəf hərəkət edən zaman sürücü avtomobili aşağı sürətlə sürüb və bu zaman qadına əxlaqsız təkliflər edib. Daha sonra o, avtomobili saxlayıb və arxa oturacağa keçərək qadına qarşı seksual xarakterli hərəkətlər edib. O, qadını hadisə barədə heç kimə məlumat verməməklə bağlı təhdid edib. Təcavüz hərəkətləri etdikdən sonra sürücü sərnişinin əlindən telefonunu alaraq tətbiqdən özünə "beş ulduz" verib.
Xarici ölkəyə gedən qadın Bakıya qayıdarkən polisə müraciət edib. Məhkəmədə təqsirləndirilən şəxs ona qarşı sürülmüş ittihamı qəbul etməsə də, müşahidə kameralarında Yusif Quliyevin magistral yolda avtomobili 20 dəqiqə saxladığı, ön oturacaqdan düşüb arxa oturacağa keçdiyi müəyyən edilib. Məhkəmə tibbi-ekspertizasında da qadına qarşı zorakılıq törədildiyi öz təsdiqini tapıb.
