Binəqədi Rayon Məhkəməsində Kəmalə Məmmədovanın (adı, soyadı şərtidir) cinayət işi üzrə məhkəmə istintaqı yekunlaşıb. Hakim Aynurə Sadıqovanın sədrliyi ilə keçirilən prosesdə hökm elan olunub.
Pravda.az xəbər verir ki, məhkəmə qərarına əsasən, Kəmalə Məmmədova Cinayət Məcəlləsinin 127.1 maddəsi ilə təqsirli bilinərək 1 il 6 ay azadlığın məhdudlaşdırılması cəzası təyin edilib. Daha sonra "Konstitusiya və Suverenlik İli" münasibətilə tətbiq olunan amnistiya ilə cəzadan azad olunub.
Hadisə 19 oktyabr 2022-ci ildə Binəqədi rayonu ərazisində fərdi yaşayış evlərinin birinin həyətində baş verib. Məlumata görə, zərərçəkmiş Təranə Vəliyeva (adı, soyadı şərtidir) əvvəlcə başqa qonşudan 200 manat borcunu tələb edib və bu zaman mübahisə yaranıb. Kəmalə Məmmədova isə mübahisəyə qoşularaq vəziyyəti daha da gərginləşdirib.
Araşdırmalar zamanı müəyyən edilib ki, hadisə zamanı ətrafda insanların olmasına baxmayaraq, Kəmalə ictimai qaydanı kobud şəkildə pozaraq Təranəyə fiziki zor tətbiq edib, onun baş və bədən nahiyələrinə yumruq və təpik zərbələri endirib.
Şahid ifadələrinə görə, tərəflər arasında mübahisə əvvəlcə sözlü başlayıb, lakin sonradan dava şəklini alıb və hadisə yerinə toplaşan şəxslər vəziyyəti sakitləşdirməyə çalışıblar.
Nəticədə zərərçəkmiş şəxs burun sümüyünün sınığı, qançırlar və tənəffüs pozuntusu ilə müşayiət olunan xəsarətlər alıb.
Təqsirləndirilən şəxs məhkəmədə özünü təqsirli bilmədiyini və ittihamları qəbul etmədiyini bildirib.
