"Bu gün bir çox insanlar elə düşünür ki, qadınların əksəriyyəti işsizlikdən yüngül həyat tərzinə qaçır. Bu, heç də doğru yanaşma deyil. Bilirsiniz, buna mühit özü gətirib çıxarır”.
Bunu gununsesi.info-ya müsahibəsində “Təmiz dünya” Qadınlara Yardım İctimai Birliyinin sədri Mehriban Zeynalova deyib.
Mehriban Zeynalova bildirib ki, insanlar özlərini qorumaq və yaşamaq üçün müəyyən yollar axtarırlar: “Bəzən qadınlar işə gedərkən saat məhdudiyyəti ilə qarşılaşır, ya da peşə və təhsil çatışmazlığı səbəbindən özlərini reallaşdıra bilmirlər. Belə hallarda bəzi qadınlar gündə 15-20 manata işləmək əvəzinə, “TikTok” kimi sosial platformalarda oturub həmin məbləği qazanmağı düşünür. Elə həmin o əhali qrupu üçün proqramların tətbiqi çox vacibdir. Biz bir tərəfdən bu məsələdən narahat olsaq da, digər tərəfdən onlara dəstək verəcək proqramlar yaratmadıqda, biz də onları asan yolla pul qazanmağa təşviq edən bir iştirakçıya çevrilirik. Təbliğatın fərqli üsullarla aparılması, elanların xarici görünüşə əsaslanması, peşəkarlıqdan çox yalnız xarici görünüşə önəm verilməsi bu prosesin doğru istiqamətdə inkişaf etməməsinə səbəb olur. Hətta mağazaya işə götürəndə də elanlarda xarici görünüşlə bağlı tələblər yer alır. Elanlarda mütləq şəkildə xarici görünüşün hansı formada olması vurğulanır. Bunların hamısı bu məsələlərdə mühüm rol oynayır. Qadınlar bəzən istismar vasitəsi kimi təqdim olunur və onların daxili aləmi, peşəkarlığı yerinə, fiziki görkəmləri ön plana çəkilir. Beləliklə, qadınlar daxili aləmini inkişaf etdirmək yerinə, xarici görkəmini tələblərə uyğunlaşdırmağa çalışırlar. Bütün bunlar isə cəmiyyətin yaratdığı ümumi mühitin nəticəsidir”.
