Azərbaycanda məişət zorakılığına qarşı mübarizə ilə bağlı yeni fəaliyyət planı hazırlanır. Plana əsasən, ölkədə məişət zorakılığına məruz qalan şəxslərin məlumat bankı yaradılacaq. Bu fəaliyyət planı çərçivəsində, məişət zorakılığına məruz qalan şəxslərin məlumat bankının yaradılması da nəzərdə tutulur. Məlumat bankı, zorakılığa məruz qalan şəxslərin vəziyyətini izləmək və onlara daha effektiv yardım göstərmək məqsədini daşıyacaq.
Zorakılıq deyəndə ağıla ilk qadınlar gəlirdi. Amma artıq zaman dəyişib. Son statistikaya görə kişilər də daxil olub. 38 kişi zorakılığa məruz qalıb. Azərbaycanda mentalitetdən irəli gələrək adətən əks hallar müşahidə olunur.
Qeyd edək ki, Ailə, Qadın və Uşaq problemləri üzrə Dövlət Komitəsindən bildirilib ki, 2024-cü ildə komitəyə məişət zorakılığı ilə bağlı 486 müraciət daxil olub. Məişət zorakılığına məruz qalan şəxslər arasında qadın və uşaqlar çoxluq təşkil edir. Belə ki, cari ildə 38 kişi, 430 qadın, 364 uşaq məişət zorakılığına məruz qalıb. Məişət zorakılığı törədənlər isə tərkibinə görə 438 nəfər kişi, 213 nəfər qadındır.
Bəs görəsən, qadınların kişilərə qarşı zorakılığı nədən irəli gəlir?
Mövzu ilə bağlı Bakuplus.az-a açıqlama verən sosioloq, fəlsəfə doktoru Mail Yaqubun sözlərinə görə, zorakılıq təkcə kişilərə aid deyil:
“Qadınlar da zorakılıq edə bilir. Zorakılıq insana xas olan əməldir. İnsan özünü güclü görəndə zorakılıq tətbiq etmək istəyir. Bu, insan psixologiyasıdır. İnsan özünü güclü görəndə qarşısındakını əzmək istəyir. İnsanlar cəzadan qorxmasa, bu əməllərin sayı daha çox olar. İnsanlar daxili nizamlama mexanizminə əməl edirlər. Cəzadan çəkinməsələr, çox cinayət başa verə bilər”.
M.Yaqub qeyd edib ki, Azərbaycanda zorakılıqla bağlı xüsusi layihə hazırlanırsa, bu, təqdirəlayiqdir:
“Təkcə bununla kifayətlənmək olmaz. Statistikasını öyrəndikdən sonra zorakılığın qarşısını almaq üçün ciddi tədbirlər görülməlidir. Təlimlər keçirilməli, ciddi media layihələri hazırlanmalıdır. Sosial şəbəkələrdə də bu məsələ ilə bağlı ciddi təbliğat aparılmalıdır. Danışmaqla da təbliğat mümkündür.
İkinci əsas məqam isə hüquqi müstəvidədir. Hüquqi baza genişlənməlidir. Cəza tədbirləri güclü olmalıdır. Həm maarifləndirmə tədbirləri, həm də hüquqi bazanın genişləndirilməsi prosesi eyni anda aparılmalıdır”.
Nəzrin Vahid
