Ali Məhkəmədə qaynını azyaşlı oğlunun gözü qarşısında xüsusi amansızlıqla qətlə yetirməkdə təqsirləndirilən Həsən Həsrətovun barəsindəki qərardan dövlət ittihamçısı tərəfindən verilən kassasiya protestinin bəzi detalları məlum olub.
Hakim Zaur Hüseynovun sədrliyi ilə keçirilən prosesdə elan edilib ki, hadisə Bakı şəhərinin Nizami rayonu ərazisində baş verib.
Cinayət işində qeyd olunur ki, Həsən Rasimi onun azyaşlı oğlunun gözü qarşısında, uşağa xüsusi psixoloji iztirab verdiyini dərk edərək xüsusi amansızlıqla öldürüb. Bıçaq zərbələri əsasən döş qəfəsinə və bədənin müxtəlif nahiyələrinə endirilib.
Ağır yaralanan şəxs qonşuların köməyi ilə xəstəxanaya çatdırılsa da, sağ ağciyərin zədələnməsi nəticəsində baş vermiş kəskin daxili və xarici qanaxmadan həyatını itirib.
Bakı Ağır Cinayətlər Məhkəməsinin hökmü ilə təqsirləndirilən şəxs Cinayət Məcəlləsinin xüsusi amansızlıqla qəsdən adam öldürmə maddəsi ilə təqsirli bilinərək 18 il müddətinə azadlıqdan məhrum edilib.
Mənbə: pravda.az
