Bu gün axşam saatlarında başlayan yağış Abşeron rayonunun Masazır kəndində ciddi fəsadlara yol açıb.
Bakuplus.az-a kənd sakinlərinin verdiyi məlumata görə, təbiət hadisəsinin qısa müddətli olmasına rəğmən avtomobil yollarından çaylar axır, səkilər isə göllərə çevrilib.
"Bu, hər zaman belə olur. Bir az yağış yağdısa, vəssalam, küçələrimiz keçilməz maneəyə dönür. Heç kim də tədbir görmək niyyətində deyil", - şikayətçilərdən biri deyib.
Bu azmış kimi, hazırda Masazırda elektrik enerjisi də kəsilib.
"Dünən axşam bir qədər yağış yağdı, işıqlarımız söndü. Səhər elektrik enerjisinin verilişi bərpa edildi. Amma sevincimiz çox çəkmədi. Masazır yenə də qaranlığa qərq olub. Doğurdanmı "Azərişıq" bir yağış qarşısında bu qədər acizdir? Yoxsa minlərlə insanın Novruzu qaranlıqda keçirməsi qurumun məsul işçilərinə zövq verir?" - sakinlər bildiriblər.
