Nərimanov Rayon Məhkəməsində hoteldə sevgilisinə xəsarət yetirməkdə təqsirləndirilən Pənah Kərəmlinin (adı və soyadı şərtidir) cinayət işi üzrə hökm elan edilib.
İstintaqa görə, hadisə 2026-cı il iyunun 10-da paytaxtdakı "Villa İnn" hotelində baş verib. Qısqanclıq zəminində yaranan mübahisə zamanı Pənah Kərəmli sevgilisi Lalə İmanovanın (adı və soyadı şərtidir) çiyninə yumruqla zərbə endirib. Ekspertiza qadına sağlamlığın qısa müddətə pozulmasına səbəb olan yüngül bədən xəsarəti yetirildiyini müəyyən edib.
Təqsirləndirilən şəxs məhkəmədə günahını etiraf edib və zərərçəkmişlə barışdıqlarını bildirib. Lalə İmanova da məhkəməyə ərizə təqdim edərək zərərin ödənildiyini, ona qarşı heç bir şikayətinin olmadığını qeyd edib və işə xitam verilməsini xahiş edib.
Məhkəmə tərəflər arasında barışığı nəzərə alaraq Pənah Kərəmlini cinayət məsuliyyətindən azad edib və cinayət işi üzrə icraata xitam verib.
mənbə: pravda.az
