Sosial şəbəkələrdə yayılan videomateriallar əsasında Xətai rayonu, Zığ şosesi, 9 ünvanında yerləşən “Təndir №1” ictimai iaşə obyektində yoxlama aparılıb. İlhamə Əsədovaya məxsus obyektdə sanitar-gigiyenik və sanitar tələblərin pozulması halları müəyyən edilib. Bu haqda bu gün, 18 iyul tarixində Bakuplus.az Azərbaycan Qida Təhlükəsizliyi Agentliyinə (AQTA) istinadən məlumat verir.
“Baxış zamanı qida obyektində bişmiş yeməklərin çiy toyuq və ət məhsulları ilə birgə saxlandığı, dondurulmuş ət məhsullarının donunun açılması (defrostasiya) proseduru üçün sahənin təşkil edilmədiyi, müvafiq təmizlik işlərinin aparılmadığı, emal və anbar sahəsində mexaniki havalandırma sisteminin quraşdırılmadığı, işçilərin tibbi müayinə arayışlarının qanunvericiliyə uyğun olmadığı və digər nöqsanlar aşkarlanıb.
Həmçinin ümumi çəkisi 6,6 kq olan subməhsulun (ağ ciyər və qara ciyər) minimum keyfiyyət və təhlükəsizliyini təsdiq edən sənədlər təqdim olunmayıb”, – deyə qurum bəyan edib.
Aşkar edilmiş qanun pozuntuları ilə əlaqədar qanunvericiliyə uyğun olaraq, ictimai iaşə obyektinin fəaliyyəti məhdudlaşdırılıb, rəhbərlik inzibati məsuliyyətə cəlb edilib.
