Rəşad Dağlı ilə İsgəndər Mehdiyev arasında baş vermiş mübahisənin təfərrüatları açıqlanıb. Bu haqda bu gün, 1 avqust tarixində Bakuplus.az Qafqazinfo-ya istinadən xəbər verir.
İsgəndər həbsxanada olanda bir nəfərin Rəşad Dağlı haqqında “üzdəniraq” ifadəsini işlətdiyini deyib. Dağlı öncə məsələni ciddiyə almayaraq İsgəndərin zənglərinə cavab verməyib. İsgəndər isə mesajlar yazmağa başlayıb:
“Qaqaş, mənəm İsgəndər. Qaqaş, mən sənə çox dedim, sən az eşitdin. Mən hara kimi lazımdır, səni müdafiə etdim. Rəşad, “üzdəniraq” söhbətin gedir. Nə qədər tezdir, gəl qabağını al”.
“Qaqaş, nə oldu, razılaşdın? Yəni, bu olub? Rəşad, mən üç gündür ki, səni müdafiə edirəm. Sən də gəl mənə dəstək ol. Gəl, tək mənlə görüşəcəksən. Sadəcə görüşək, bir-iki şey var ki, onları sən bilirsən”.
“Rəşad, o boyda mövzu gedir, sənin üçün heç maraqlı deyil. Mənə təcili zəng elə, gözləyirəm”.
“Rəşad, sən gəlməsən, məcbur olub məhlədən bir-iki nəfəri götürüb söhbətə gedəcəyəm. Dua elə, söhbətimiz sülhlə qurtarsın”.
Bundan sonra Dağlı İsgəndərlə görüşə razı olub. Rəşad həmin adamın adını təkidlə soruşsa da, İsgəndər heç nə deməyib və Rəşaddan 3000 AZN istəyib.
“Həmin adamın problemi var, ona 6000 manat lazımdır, həmin şəxs 3000 manat tapıb, 3000 manatı isə qalıb. 3000 manat versən, söhbət bağlanar”, - deyə İsgəndər qeyd edib.
Rəşadın sözlərinə görə, İsgəndər pul ala bilməyəcəyinə əmin olduqdan sonra, onun ünvanına ağır söyüşlər söyüb və bıçağı əlində oynatmağa başlayıb. Bu zaman Rəşad onun əlindən bıçağı alaraq İsgəndəri vurub.
İsgəndər Mehdiyevin yaxınları Rəşad Dağlıdan şikayətçi olmayıblar.
