Sosial şəbəkələrdə insanlara öz tanışlarının adı ilə yazıb onlardan pul istəyən dələduzların sayı gündən-günə artır. Çoxları da bu pulu göndərdikdən sonra aşkar edir ki, ona yazan dostu yox, dələduz imiş. Bu haqda bu gün, 30 oktyabr tarixində Bakuplus.az ARB Xəbər-ə istinadən məlumat verir.
Sosial şəbəkədə dələduzların toruna düşənlərdən biri olan Taleh Əsədov bildirib ki, dostunun şəkli, ad və soyadı olan abonent ondan təcili olaraq 450 manat xahiş edib:
“Deyir: “Mənə pul lazımdır, pul atmalıyam, Zamiq də yatır”. Hətta onun qardaşının adını belə çəkdi. Üstündən bir az keçdi, başqa bir şəkil qoydu telefona. Mən o nömrəni yığmaq istədim, gördüm zəng getmədi, məni bloka atdı, mən ona nə zəng edə bildim, nə də profil şəklini görə bildim ki kimdir, hansı nömrədir”.
Dələduzlar insanların şəxsi məlumatlarını əldə edərək, ən çox kontaktda olduqları şəxslərlə əlaqəyə keçirlər. Mütəxəssislərin sözlərinə görə, telefonumuza yüklədiyimiz tətbiqlər vasitəsilə mobil məlumatlarımız dələduzlar üçün daha əlçatan olur.
Daxili İşlər Nazirliyinə (DİN) son zamanlar bu kimi hallarla bağlı çoxsaylı müraciətlər daxil olur. Qurum sosial şəbəkə istifadəçilərinə belə məsələlərə diqqətlə yanaşmağı, bu tipli elanları paylaşan şəxslərə heç bir ödəniş etməməyi və şəxsi məlumatlarını, fotolarını kənar şəxslərlə paylaşmamağı tövsiyə edir. Əks halda bu cür dələduzların qurbanı ola bilərlər.
