Ləğv olunan Bakı Nəqliyyat Agentliyinin rüşvət almaqda təqsirləndirilən əməkdaşlarının cinayət işi məhkəməyə göndərilib. Bu haqda bu gün, 2 noyabr tarixində Bakuplus.az Qafqazinfo-ya istinadən məlumat verir.
Hikmət Vəlizadə və Vüqar Hüseynovun işləri üzrə toplanmış materialları Bakı Ağır Cinayətlər Məhkəməsinin hakimi Rasim Sadıxovun sədrlik etdiyi hakimlər heyəti araşdıracaq.
Agentliyin Yol hərəkətinin təşkili şöbəsinin müdir müavini Vüqar Hüseynov və qeyd olunan şöbədə məsləhətçi olan Hikmət Vəlizadə paytaxt ərazisində parklanma sahəsinin təşkili üçün müxtəlif şəxslərdən ümumilikdə 16.500 AZN rüşvət almaqda ittiham olunurlar.
Cinayət işi üzrə Yerüstü Nəqliyyat Agentliyi zərərçəkmiş qismində tanınıb.
