Prezident Administrasiyasının sabiq rəhbəri Ramiz Mehdiyevin qızı Kamilə Əliyeva "Bakı Oksford Məktəbi"nin müsadirəsi ilə bağlı Ali Məhkəməyə kassasiya şikayəti verib.
Report.az xəbər verir ki, Bakı Apellyasiya Məhkəməsinin qərarından narazı qalan Kamilə Əliyeva Ali Məhkəməyə müraciət edərək məktəb binasının yarısının pay sahibi olduğu və üzərinə qoyulan həbsin götürülməsi və hərracdan çıxarılmasını istəyib.
Onun kassasiya şikayəti icraata verilib. Şikayət hakim Teyyub Muxtarovun icraatına verilib. Kassasiya şikayətinə iyulun 23-də baxılacaq.
Xatırladaq ki, "Bakı Oksford Məktəbi" "Baku Steel Company"nin keçmiş rəhbəri Rasim Məmmədova məxsus olub. O, Dövlət Təhlükəsizliyi Xidməti (DTX) tərəfindən həbs edilib. Məmmədova xüsusilə külli miqdarda mənimsəmə ittihamı ilə 13 il 9 ay həbs cəzası verilib.
Məmmədovun milyonlarla manat dəyərində əmlakı, o cümlədən "Bakı Oksford Məktəbi" də müsadirə olunub. Kamilə Əliyeva məktəb binasının yarısının pay sahibi olduğunu iddia edir.
Məktəb bir müddət əvvəl 18 milyon 527 min 250 manata hərraca çıxarılmışdı.
Kamilə Əliyeva Səbail Rayon Məhkəməsinə müraciət edərək təhsil müəssisəsinin üzərinə qoyulan həbsin götürülməsi və hərracdan çıxarılmasını istəyib. Səbail Rayon Məhkəməsi onun iddiasını təmin etməyib. Bakı Apellyasiya Məhkəməsində də sabiq aparat rəhbərinin qızının şikayəti təmin edilməyib.
