İrana cəsusluq edən iki şəxsin məhkəməsinin ilk iclası keçirildi - YENİLƏNİB

Təqsinləndirilən şəxslərin hazırlıq iclası keçirildi. Məhkəmədə hər 2 şəxs Bakı İstintaq Təcridxanasına köçürülməsini istədi. Məhkəmə onların vəsatətini qəbul etdi.

Növbəti iclas 16 avqust tarixinə təyin edilib.

13:29 - İrana cəsusluq edən iki şəxsin məhkəməsi başlayır

Dövlətə xəyanətdə təqsirləndirilən Arif Rəsulov və Elnur Rəsulovun cinayət işi üzrə məhkəmə prosesi başlayır. Bu haqda bu gün, 4 avqust tarixində Bakuplus.az Report-a istinadən məlumat verir.

Prosesi Bakı Ağır Cinayətlər Məhkəməsinin hakimi Siyavuş Hacıyev idarə edəcək.

Məhkəmənin hazırlıq iclasının bu gün keçiriləcəyi gözlənilir.

Hər iki şəxs Cinayət Məcəlləsinin “dövlətə xəyanət” maddəsi ilə ittiham olunub.

Ötən ilin noyabr ayında Azərbaycan Dövlət Təhlükəsizliyi Xidmətinin (DTX) həyata keçirdiyi kompleks əməliyyat-istintaq tədbirləri nəticəsində İran xüsusi xidmət orqanlarının yaratdığı casus şəbəkəsi ifşa edilib.

Həmin şəxslər Bakı və regionlarda dövlət təhlükəsizliyi və müdafiə qabiliyyətinə zərər verəcək məlumatları toplayaraq İran tərəfinə göndərirdilər.

Belə ki, toplanan məlumatlar aşağıdakılardır:

• Xəzər dənizində xarici dövlətlərin fəaliyyət göstərən şirkət və nümayəndəlikləri, Hərbi Dəniz Qüvvələrinin keçirdiyi təlimlərin yeri və vaxtı, neft platformalarına daşınan yüklər barədə məlumatlar;


• Qaradağ rayonunda neft və qaz boru kəmərlərinin keçdiyi ərazilər;


• Hava limanlarında saxlanılan pilotsuz uçuş aparatlarının və müxtəlif hərbi avadanlıqların olduğu sahələr;


• Bakı şəhərində keçirilən “Texnofest” festivalında nümayiş etdirilmiş texnikalar barədə məlumat;

• Paytaxtda və regionlarda yerləşən strateji və hərbi obyektlər, hərbi hissələr, zenit-raket kompleksləri, eləcə də digər radar-nəzarət qurğuları barədə məlumat, foto və videomateriallar;

• Xarici dövlətlərin Azərbaycanda fəaliyyət göstərən nümayəndəlikləri, ölkədə baş verən ictimai-siyasi proseslər haqda məlumatlar.