Son 45 gün ərzində Daxili İşlər Nazirliyi (DİN) Baş Narkotiklərlə Mübarizə İdarəsinin əməkdaşları tərəfindən İrandan qaçaqmalçılıq yolu ilə narkotik vasitələrin Azərbaycana gətirilməsi ilə məşğul olan mütəşəkkil dəstənin üzvlərinə qarşı Bakıda və respublikanın digər rayonlarında bir sıra əməliyyat tədbirləri həyata keçirilib. Bu haqda bu gün, 21 avqust tarixində Bakuplus.az DİN-ə istinadən məlumat verir.
Baş İdarə əməkdaşlarının həyata keçirdikləri sonuncu əməliyyat tədbiri zamanı mütəşəkkil dəstənin üzvləri - Azər Bədəlov, Əmrah Əlizadə, Nurlan Bayramov, Elmin Məmmədov, tanışı Qüdrət Həsənov və Samirə Novruzəliyeva saxlanılıblar.
Onlardan 20 kiloqram heroin, 29 kiloqram marixuana, 10 kiloqram tiryək və 8 kiloqram metamfetamin olmaqla ümumilikdə 67 kq narkotik vasitə və psixotrop maddə aşkar edilib. Bu şəxslər İrandan gətirilən qanunsuz narkotiklərin əsas tədarükçülərindən olublar.
Baş İdarə tərəfindən bu müddət ərzində həyata keçirilən əməliyyat tədbirləri nəticəsində ölkə ərazisində narkotik vasitələrin qanunsuz dövriyyəsi ilə məşğul olan ümumilikdə 66 nəfər saxlanılıb. “Qara bazar”da qanunsuz dövriyyədən 32 milyon manat dəyərində 400 kiloqram narkotik vasitə - heroin, tiryək, həşiş, psixotrop maddələrlə zənginləşdirilmiş marixuana, metamfetamin, o cümlədən 7300 min ədəd metadon tableti qanunsuz dövriyyədən çıxarılıb.
Faktla bağlı Cinayət Məcəlləsinin müvafiq maddələri ilə cinayət işi başlanıb, saxlanılan şəxslər barəsində qabaqlayıcı tədbirlər həyata keçirilib.
