Bakıda narkomaniya, alkoqolizm və digər aludəçilikdən müalicə mərkəzi kimi fəaliyyət göstərən “New Life” reabilitasiya mərkəzinin 5 əməkdaşı ilə bağlı məhkəmə prosesi keçirilib. Bu haqda bu gün, 25 iyul tarixində Bakuplus.az APA-ya istinadən məlumat verir.
Proses Bakı Ağır Cinayətlər Məhkəməsində hakim Rasim Sadıxovun sədrliyi ilə keçirilib.
Dövlət ittihamçısı çıxış edərək Orucəli Heydərov və Novxanı qəsəbəsində yerləşən mərkəzin müdiri Elvüsal Hüseynovun 11 il, Sərxan Əliyevin 10 il 6 ay, Famil Rzayev və Qənbər Həsənovun isə 10 il müddətinə azadlıqdan məhrum edilməsini istəyib.
İttihama görə, “Yeni Həyat” reabilitasiya mərkəzində müalicə alan xəstələrin hər birindən 1500 manatdan 6600 manata qədər ödəniş alınıb. Reabilitasiya zamanı dünyada narkomaniya və alkoqolizmin müalicəsində istifadə olunan “12 addım” proqramından istifadə olunub. Lakin qaydalara və əmrlərə tabe olmayanlara qarşı zorakılıq edilib. Belə ki, xəstələrdən biri H.Məmmədov mərkəzdən qaçmaq istəyən zaman işçilər onu yaxalayaraq döyüblər. Qaçmaması üçün əl-qolunu bağlayıb, bu vəziyyətdə saxlayıblar. Bundan sonra onun vəziyyəti pisləşib. Xəstəxanaya çatdırılsa da, onu xilas etmək mümkün olmayıb.
Digər xəstələr: F.Həsənov, K.Əliyev və C.Əliyev işgəncələr nəticəsində müxtəlif bədən xəsarətləri alıblar. Onların barmaqlarının sındığı və başqa işgəncələrə məruz qaldıqları bildirilib. Əvvəlcə H.Məmmədovun işgəncə nəticəsində öldüyü ehtimal edilsə də, ekspertizanın rəyindən sonra onun böyük dozada narkotikdən öldüyü məlum olub.
Prokurorluqda aparılan istintaqın nəticələrinə görə, beş nəfər Cinayət Məcəlləsinin “İşgəncə”, “Qanunsuz olaraq azadlıqdan məhrum etmə” maddələri ilə ittiham olunub.
