Ərinin qətlini sifariş edən qadının məhkəməsi davam edir. Bu haqda bu gün, 17 avqust tarixində Bakuplus.az Lent.az-a istinadən xəbər verir.
Hakim Səyavuş Hacıyevin sədrliyi ilə keçirilən prosesdə təqsirkar 23 yaşlı Əzizə Seyidova özünü təqsirli bilməyib. Onun vəkili istintaqın düzgün aparılmadığını bildirib və işin yenidən yoxlanılmasını istəyib.
İttihama görə, Əzizə Seyidova həyat yoldaşı Əli Seyidlini ona xəyanət etməsinə görə öldürmək istəyib. O, bu məqsədlə siçan dərmanı alaraq Əli Seyidlinin yeməyinə qatmaq istəyib. Daha sonra Əzizə bu fikrindən daşınaraq onun qətlini sifariş etmək qərarına gəlib.
Bu məqsədlə Əzizə Seyidli tanışı Mehdi Məmmədliyə ərinin ölümünü sifariş verib. 2022-ci ildən etibarən Əzizə Seyidli Mehdi Məmmədli ilə İnstagram vasitəsilə mütəmadi danışıb, onun evə gəlib-getmə vaxtlarını deyib.
15 mart 2023-cü ildə o, Mehdi Məmmədli ilə danışıb və yoldaşının həmin gün öldürülməsini tapşırıb. M.Məmmədli də sifarişə uyğun olaraq, dostları ilə birlikdə gecə saat 00:00 radələrində Əli Seyidlinin yaşadığı ünvana gələrək gözləyiblər. Əli Seyidli evinə daxil olarkən M.Məmmədli və dostları onun qarşısını kəsərək çoxsaylı bıçaq xəsarətləri ilə qətlə yetiriblər.
