Rusiyanın “Rəsul Qəmzətov” hərbi gəmisi Bakıda olub, sərhəd təhlükəsizliyinin təmini müzakirə edilib. Bu barədə bu gün, 7 oktyabr tarixində Azərbaycan Dövlət Sərhəd Xidmətinin (DSX) mətbuat mərkəzindən məlumat verilib.
Gəmi Azərbaycan Dövlət Sərhəd Xidməti ilə Rusiya Federal Təhlükəsizlik Xidmətinin Sərhəd Xidməti arasında 2023-2024-cü illər üçün fəaliyyət planının icrası çərçivəsində oktyabrın 4-dən 6-dək Bakıya dostluq səfəri edib.
Rusiya nümayəndə heyətini Azərbaycan Dövlət Sərhəd Xidmətinin rəisi general-polkovnik Elçin Quliyev qəbul edib.
İclas iştirakçıları Azərbaycan və Rusiya Federasiyasının sərhəd strukturları arasında əməkdaşlığın, o cümlədən Xəzər dənizində sərhəd təhlükəsizliyinin təmin edilməsi, bioloji resursların mühafizəsi, qanunsuz fəaliyyətlə mübarizə sahəsində əməkdaşlığın uğurla inkişaf etdiyini qeyd ediblər.
