Sabiq deputat Nazim Bəydəmirlinin məhkəməsi davam edir. Bu haqda bu gün, 14 may tarixində Bakuplus.az APA-ya istinadən xəbər verir.
Bakı Ağır Cinayətlər Məhkəməsində keçirilən prosesdə təqsirləndirilən şəxsin vəkili Aqil Layıc Nazim Bəydəmirlinin ev dustaqlığına buraxılması barədə vəsatət qaldırıb.
Müşavirədən sonra məhkəmə təqsirləndirilən şəxsin ev dustalığına buraxılması barədə vəsatəti təmin etməyib. Daha sonra dövlət ittihamçısı ittiham aktını elan edib.
Belə ki, N.Bəydəmirli 1996-cı ildə Rusiyada spirtli içki biznesi ilə məşğul olan azərbaycanlı Mürsəl İbrahimovu kriminal aləmin adamları vasitəsilə hədələyərək ondan müxtəlif vaxtlarda ümumilikdə 58.000 ABŞ dolları pul alıb, eləcə də zərərçəkəni biznesə yatırdığı 40.000 ABŞ dollarından imtina etməyə məcbur edib.
Həmçinin o, şirkətin Müşahidə Şurasının sədri Ədalət Bağırovu müxtəlif qadınlarla intim görüntülərini internetdə yaymaqla hədələyib, ondan 50.000 AZN pul tələb edib və 10.000 AZN alıb.
Nazim Bəydəmirli özünü təqsirli bilməyib. Proses 27 may tarixində davam etdiriləcək.
