Sabunçu Tibb Mərkəzinin yenilənmiş cərrahi profilli reanimasiya şöbəsində 1000-dən çox pasiyentə xidmət göstərilib. Bu haqda bu gün, 19 avqust tarixində Bakuplus.az TƏBİB-ə istinadən xəbər verir.
Sabunçu Tibb Mərkəzinin cərrahi profilli reanimasiya şöbəsi ötən ilin sonunda yenidən istifadəyə verilib. Qısa müddətdə vəziyyəti ağır və orta ağır olan 1 058 pasiyentə tibbi xidmət göstərilib. Şöbə müasir avadanlıqlarla təmin olunub və daxil olan pasiyentlərin 90%-dən çoxunun həyatını xilas etməyə imkan tanıyır.
Şöbə yeni süni tənəffüs aparatları, defibrilyator, videolarinqoskop və EKQ aparatları ilə təchiz edilib. Kəllə-beyin və müştərək travmalarla daxil olan xəstələr üçün portativ avadanlıqlar da mövcuddur. Şöbə ağır vəziyyətdə olan pasiyentlər üçün tam hazır vəziyyətdədir.
Tibb personalının müşahidəsi üçün nəzarət otaqları yaradılıb və otaqlar mərkəzi havalandırma sistemi ilə təmin edilib. Reanimasiya otaqları 22 çarpayı ilə təchiz olunub, infeksion xəstələr üçün isə izolyasiya otağı da var.
