Vətəndaş Emil Maqalov şəxsi "Facebook" hesabında diqqətçəkən paylaşım edib.
Bakuplus.az xəbər verir ki, o, "Şərur" MTK-nın rəhbəri Şərurlu İsfəndiyarla bağlı şikayətini ictimailəşdirib. Belə ki, Emil Maqalov Saray qəsəbəsində yerləşən “Jasmin Park” yaşayış kompleksindən kreditlə aldığı evin müqavilə şərtləri ilə bağlı haqsızlığa məruz qaldığını bildirib.
E.Maqalov qeyd edib ki, kreditlə aldığı evin ödənişində 3 aya yaxın gecikməsi olub. Əvvəllər 2-3 aylıq borcu toplu şəkildə ödəyərkən heç bir problem yaşanmayıb və ona bu barədə xəbərdarlıq edilməyib:
“Saray qəsəbəsi “Jasmin Park”dan kreditə aldığım evin kreditini 3 aydan az gecikdirməm var. Çox vaxt 2-3 ayı 1 yerdə ödəyirdim, özü də nağd, əldən-ələ, bir söz deyən olmurdu. Hazırda da həmişəki kimi həmən 3 ayın pulunu ödəməyə gəlmişdim. Sonuncu ödənişim fevral ayında olub. İndi isə dedilər ki, müqavilədə də göstərilib ki (müqavilədə bu bənd var), 2 ay gecikmə olduqda ev digər şəxsə satılır.
Sadəcə, bəs bunu 3 ildir niyə demirdilər? 3 ildir 2-3 ayı 2-3 aydan bir ödəyirdim, amma indi dedilər? İndi də mənə “3-6 ayı birdəfəyə ödəyə bilərsən” deyən işçiləri də işdən qovub. İsfəndiyar müəllim, sizin öz işçilərinizlə probleminiz varsa, mənim nə günahım var?
Hazırda krediti tam bitirməyimə 6000 qalıb. Bunlar da deyir ki, sən evi alanda, yəni 2022-ci ildə 1 kvm 650 AZN idi, İndi 1250 AZN-dir. Evə ödədiyim məbləği, yəni 1 kvM 650 AZN-dən qaytarmaq şərti ilə evi əlimdən alır və ya 44000 cərimə yazırlar. Çox çək-çevirdən sonra cəriməmi 20000 AZN-ə saldı. Halbuki evin ümumi dəyəri 47700 AZN-dir”.
Ekspert məsələylə bağlı Şərurlu İsfəndiyarla görüşüb: “Özü ilə şəxsən görüşdüm. Danışmağa belə imkan vermədi. Kobud şəkildə, “Xoşun gəlmir, qaytar evi” dedi”.
