Xəzər Rayon Məhkəməsində qəsdən sağlamlığa az ağır zərər vurmada təqsirləndirilən Alim Məlikovun cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Toğrul Məmmədovun sədrliyi ilə keçirilən prosesdə hökm oxunub.
İttiham aktına əsasən, Alim Məlikov zərərçəkmiş Lalə Məlikovaya sağlamlığının qısa müddətə pozulmasına səbəb olan yüngül dərəcəli bədən xəsarətləri yetirib.
Təqsirləndirilən şəxs 26 iyul 2025-ci il tarixdə, saat 22:00 radələrində Bakı şəhəri, Xəzər rayonu, Binə qəsəbəsi ərazisində yerləşən nömrəsiz fərdi evdə olarkən qızının mobil telefonuna gələn zənglə bağlı arvadı, zərərçəkmiş şəxslə aralarında mübahisə yaranıb. Zəng edən şəxsin Pənah (şərti) adlı kişi olduğunu eşidən və sərxoş vəziyyətdə olan təqsirləndirilən şəxs əsəbiləşərək mobil telefonu qızının əlindən alıb, zəng etdiyi nömrədən kişi və qadın səsləri eşitdikdən sonra ailədaxili münasibətlər zəminində qısqanclıq səbəbi ilə mübahisə daha da gərginləşib.
Mübahisə zamanı Alim mobil telefonu ataraq arvadının alın nahiyəsinə vurub. Nəticədə Lalənin alın nahiyəsində hematoma əmələ gəlib. Daha sonra zərərçəkmiş şəxs evdən çıxaraq qaçmağa çalışsa da, təqsirləndirilən şəxs onu evin qaranlıq həyətində yaxalayaraq yerə yıxıb, qol nahiyələrindən yumruq və təpik zərbələri endirib. Nəticədə zərərçəkmiş şəxsin sol bazusu və sol saidində qançırlar yaranıb.
Bundan sonra Alim həyət ərazisində olan dəmir boru ilə qadının çanaq və bud nahiyələrinə bir neçə dəfə qəsdən zərbə endirərək ona xəsarət yetirib. Qeyd olunan xəsarətlər Lalənin sağlamlığının qısa müddətə pozulmasına səbəb olub və yüngül dərəcəli sağlamlığa zərər vurma kimi qiymətləndirilib.
Məhkəmənin hökmü ilə "Konstitusiya və Suverenlik İli" münasibətilə amnistiya elan edilməsi haqqında" Milli Məclisin Qərarının 5.1-ci bəndinə əsasən təqsirləndirilən şəxs barəsində Cinayət Məcəlləsinin müvafiq maddəsi ilə olan cinayət təqibinə və cinayət işinin icraatına xitam verilib.
