Pirallahı Rayon Məhkəməsində qəsdən sağlamlığa yüngül zərər vurmada və xuliqanlıqda təqsirləndirilən İqbal İsrafilovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, ittiham aktına görə, İqbal İsrafilov 2024-cü ildə Bakı şəhəri, Pirallahı rayonu ərazisində tanışı, zərərçəkmiş Ellada Bədəlovaya (adı, soyadı şərtidir) aralarında yaranmış mübahisə zamanı bədən xəsarətləri yetirilib.
Bundan başqa, təqsirləndirilən şəxs 2025-ci ildə Pirallahı rayonu, Əzizbəyov küçəsində yerləşən marketin qarşısında ictimai qaydanı kobud surətdə pozan, cəmiyyətə açıq-aşkar hörmətsizlik ifadə edən qərəzli hərəkətlər edib.
Belə ki, İqbal heç bir əsaslı səbəb olmadan marketin qarşısında olan kənar şəxslərin gözü qarşısında Ellada ilə mübahisə edib, xuliqanlıq niyyəti ilə qəsdən onun sifətinə zərbə endirib.
Onun barəsində Cinayət Məcəlləsinin 221.1-ci (xuliqanlıq) və 128-ci (qəsdən sağlamlığa yüngül zərər vurma) maddələri ilə ittiham irəli sürülüb.
Məhkəmə iclasında İqbal İsrafilov özünü təqsirli bilərək ifadəsində göstərib ki, o, Elladanı uzun müddətdir tanıyır. Bildirdiyinə görə, onlar əvvəllər ər-arvad münasibətində yaşayıb və o, daima qadının yaşadığı evə gedib-gəlib. Təqsirləndirilən şəxs qeyd edib ki, mübahisəyə Elladanın spirtli içkinin təsiri altında ona niyə işləmədiyini bildirməsi və nalayiq ifadələr işlətməsi olub.
Hakim Faiq Qasımovun sədrliyi ilə keçirilən prosesdə hökm oxunub.
Məhkəmənin hökmü ilə o, 5 ay 28 gün müddətə azadlıqdan məhrum edilib.
