Nizami Rayon Məhkəməsində qəsdən sağlamlığa yüngül zərərvurmada təqsirləndirilən Alı Alıyevin (adı və soyadı şərtidir) cinayət işi üzrə məhkəmə istintaqı yekunlaşıb.
Pravda.az xəbər verir ki, hakim Emin Axundovun sədrliyi ilə keçirilən prosesdə hökm oxunub.
Məhkəmənin hökmü ilə icraata xitam verilib və o, cinayət məsuliyyətindən azad edilib.
İttihama görə, hadisə 2026-cı il fevralın 20-də paytaxtın Nizami rayonu ərazisində baş verib.
Belə ki, Alı Alıyev qeyri-rəsmi nikahda yaşadığı zərərçəkmiş Səmayə Səfərzadənin (adı və soyadı şərtidir) onun mobil telefonunda başqa qızla yazışmasını görməsi ilə aralarında qısqanclıq zəminində mübahisə yaranıb. Mübahisə zamanı qadın ona qarşı nalayiq ifadələr işlədib. Bu zaman təqsirləndirilən şəxs yumruqla onun üz və bədəninin müxtəlif nahiyələrinə zərbələr endirib.
Nəticədə Səmayə Səfərzadə bədən xəsarətləri alıb. Həmin xəsarətlər ümumilikdə sağlamlığın qısa müddətə pozulmasına səbəb olan yüngül zərər kimi qiymətləndirilib.
Beləliklə, Alı Alıyevin əməli Cinayət Məcəlləsinin 128-ci maddəsində nəzərdə tutulmuş qəsdən sağlamlığa yüngül zərərvurma kimi tövsif olunub.
