Xərçəng xəstəliyindən əziyyət çəkən insanlara kömək məqsədilə sosial şəbəkələrdə yerləşdirilən bank kartlarından pul oğurlayan şəxs saxlanılıb. Bu haqda bu gün, 12 iyul tarixində Bakuplus.az Daxili İşlər Nazirliyinin (DİN) mətbuat xidmətinə istinadən məlumat verir.
Keçirilən əməliyyat-texniki tədbirlər nəticəsində kibercinayətkarlıqla məşğul olan Aslan Qurbanov saxlanılaraq cinayət məsuliyyətinə cəlb edilib.
İstintaq zamanı məlum olub ki, Qurbanov xərçəng xəstələrindən maddi yardım toplamaq üçün müxtəlif sosial şəbəkələrdə yerləşdirilmiş bank kartı məlumatlarını götürərək xarici virtual nömrələr vasitəsilə həmin şəxslərlə əlaqə saxlayıb. O, həmin şəxslərə kömək etmək adı ilə onları aldadaraq bank kartları ilə bağlı məxfi məlumatları əldə edib.
Qurbanov informasiya texnologiyalarının köməyi ilə oğurladığı pulları gözdən qaçırmaq üçün əvvəlcə xaricdəki bukmeker kontorlarındakı hesablarına köçürüb. Daha sonra pulu bank kartına köçürüb və nağdlaşdırıb.
Faktla bağlı araşdırma davam edir, cinayət işi açılıb.
