Bakının Binəqədi rayonu, Sulutəpə qəsəbəsində yerləşən 313 nömrəli tam orta məktəbdə istilik sisteminin qaydasında olmaması ilə bağlı məlumatlara son günlərdə tez-tez rast gəlirik.
Valideynlər iddia edir ki, məktəbin birinci mərtəbəsində dizel yanacağı ilə işləyən isidici qurğu quraşdırılsa da, ikinci və üçüncü mərtəbələrdəki sinif otaqlarında şagirdlər saatlarla soyuqda oturmalı olurlar. Onlar övladlarının tez-tez xəstələndiyini dilə gətirirlər.
Bakuplus.az-a danışan bəzi valideynlər isə maraqlı iddia ilə çıxış ediblər. Onlar deyiblər ki, məktəb tikiləndə mavi yanacaqla işləyən qazanxanın fəaliyyət göstərməsinə Fövqəladə Hallar Nazirliyi icazə verməyib. Buna görə də rəhbərlik məktəbi dizel yanacağı ilə işləyən qazaxana vasitəsilə isitmək məcburiyyətində qalıb. Məktəbi dizel yanacağı ilə isitmək isə həm baha başa gəlir, həm də sinif otaqları tam qızmır.
İddialara aydınlıq gətirmək üçün Bakı şəhəri üzrə Təhsil İdarəsi ilə əlaqə saxladıq. İdarədən bildiriblər ki, vaxtilə 313 nömrəli məktəbdə biri mavi yanacaq, biri dizel yanacağı ilə işləmək şərti ilə iki qazanxanın fəaliyyət göstərməsinə icazə verilib: "Hazırda hər iki qazanxana yüksək səviyyədə fəaliyyət göstərir, iddiaların ciddi əsası yoxdur. Doğrudur, iki sinif otağının qızdırılması ilə bağlı kiçik problem olub, amma bu problem də aradan qaldırılıb".
Qeyd edək ki, 313 nömrəli tam orta məktəb 2007-ci ildən fəaliyyət göstərir. 840 şagirdin təhsil alması üçün nəzərdə tutulan məktəbdə hazırda 2515 şagird təhsil alır.
