Bakıda 19 yaşlı qızın intihar etməsinə səbəb məlum olub. Bu haqda 1 iyun Oxu.az məlumat verib.
Ötən il noyabrın 27-də 2-ci kurs tələbəsi olan 18 yaşlı Fatimə Nemətova özünü Yasamal rayonunda yerləşən “Qələbə Residence” yaşayış kompleksindəki binaların birindən ataraq intihar edib. Fatimənin ölümündə təqsirləndirilən Nadir (şərti ad) Cinayət Məcəlləsinin “Özünü öldürmə həddinə çatdırma”, “Şəxsi həyatın toxunulmazlığını pozma”, “Oğurluq, zərərçəkmiş şəxsin üzərindən, cibindən, çantasından və ya digər əl yükündən çıxarılmaqla törədildikdə” və “Pornoqrafik materialları və ya əşyaları qanunsuz yayma” maddələri ilə təqsirləndirilib və 4 il 6 ay müddətinə azadlıqdan məhrum edilib.
Məlum olub ki, Nadir qızla görüş zamanı onun gödəkçəsinin cibindən “Apple Iphone 11” markalı mobil telefonu oğurlayıb. Bundan sonra Nadir Fatimənin telefonunda olan çoxsaylı açıq-saçıq foto və videoları başqa telefona köçürüb, oğurladığı telefonu isə dostunun şəxsiyyət vəsiqəsi ilə 800 manata satıb.Daha sonra isə tələbənin telefonundan köçürdüyü açıq-saçıq görüntüləri “Telegram” sosial şəbəkəsində yayıb.
Bundan sonra dostları Fatiməyə, onun pornoqrafik görüntülərinin sosial şəbəkələrdə yayıldığını bildiriblər. Fatimə isə həmin görüntülərin oğurlanmış telefonundan götürüldüyünü deyib. O, daha sonra dostlarının birinə: “Hər şey üçün çox sağ ol, məni yaddan çıxar, çox təəssüf edirəm ki, sonluq belə oldu, biz onunla səni həmişə sevəcəyik, artıq heç nəyin mənası qalmayıb”, - sözlərini yazıb və yaşadığı çoxmərtəbəli binadan özünü ataraq həyatına son qoyub.
Məhkəmədə təqsirləndirilən Nadir törətdiyi əmələ görə özünü təqsirli bildiyini deyib. O, Fatimənin görüntülərini əylənmək məqsədilə yaydığını qeyd edib.
