Türkiyə prezidenti Rəcəb Tayyib Ərdoğan bazar ertəsi, iyunun 12-də Azərbaycana dövlət səfərinə gəlib. Bu haqda bu gün, 13 iyun tarixində Bakuplus.az Azərtac xəbər agentliyinə istinadən məlumat verir.
Türkiyə lideri Azərbaycan Prezidenti İlham Əliyevin dəvəti ilə Bakıya səfər edib. Ötən axşam Gülüstan sarayında Azərbaycan Prezidenti İlham Əliyevin və birinci xanım Mehriban Əliyevanın adından Türkiyə Respublikasının Prezidenti Rəcəb Tayyib Ərdoğanın və birinci xanım Əminə Ərdoğanın şərəfinə dövlət ziyafəti təşkil olunub.
Səfərin rəsmi hissəsi bu gün, iyunun 13-də baş tutacaq.
Verilən məlumata görə, Ərdoğanla Əliyev arasında görüş əvvəlcə təkbətək, sonra isə nümayəndə heyətlərinin iştirakı ilə geniş tərkibdə keçiriləcək. Görüşlərin sonunda hər iki lider mətbuata açıqlamalar verəcək.
Ərdoğan Bakıya gəlməzdən əvvəl Şimali Kipr Türk Respublikasına (ŞKTC) səfər edib. Seçkilərdən sonra Türkiyə prezidenti ənənəvi olaraq ilk olaraq Azərbaycana və ŞKTC-yə səfər edir.
Türkiyədə prezident seçkilərinin ikinci turu mayın 28-də keçirilib və Ərdoğan seçicilərin 52,18 faizinin dəstəyini qazanaraq qalib gəlib.
